ཚོགས་གཙོ་ཨ་རུན་ཀ་པུར་མཆོག་ནི་ལོ་ངོ་༣༡ ལྷག་རིང་ཤེས་ཡོན་ཐོག་ཕྱག་ལས་གནང་བའི་ཉམས་མྱོང་ཡོད་པ་དང་། ཁོང་ལྡེ་ར་ལྡུན་དུ་ཡོད་པའི་ལྡུན་སློབ་གྲྭ་ནས་སློབ་མཐར་ཕྱིན་རྗེས་ལྡི་ལིར་ཡོད་པའི་དབྱིན་ཇིའི་སློབ་གྲྭ་ཞིག་ཏུ་བསྐྱོད། ད་ལྟའི་ཆར་ཁོང་རྒྱ་གར་གྱི་གསར་ཁང་ཆེ་གྲས་The India Today ཡི་ Learn Today ཞེས་པའི་སྡེ་ཚན་གྱི་འཛིན་སྐྱོང་འགན་འཛིན་གནང་མུས་ཡིན་པ་མ་ཟད། ཁོང་ནི་རི་ཏིན་ཇཱ་ལི་གཞུང་འབྲེལ་མ་ཡིན་པའི་ཚོགས་པའི་ཚོགས་གཙོ་ཡང་ཡིན། ཚོགས་པ་དེས་སྤྱི་ཚོགས་ཡར་རྒྱས་གཏོང་ཆེད་དུ་རྒྱ་གར་ནང་ཡོད་པའི་ཉམ་ཐག་ཕྲུ་གུ་རྣམས་ལ་ཤེས་ཡོན་གྱི་མཐུན་རྐྱེན་བསྐྲུན་པའི་ཕྱག་ལས་གནང་བཞིན་ཡོད། ཁོང་ནི་Transforming Schools: Empowering Children ཞེས་པའི་དཔེ་དེབ་ཀྱི་རྩོམ་པ་པོ་ཡིན།

རྒྱ་རི་སྒྲོལ་མ་ལགས་ནི་བཙན་བྱོལ་ནང་བུད་མེད་བཀའ་བློན་(ནང་སྲིད་བཀའ་བློན།)གནང་མཁན་དང་པོ་དེ་ཡིན། ཁོང་ཕྱི་ལོ་༡༩༩༠-༢༠༡༠ བར་ཐེངས་བཞི་བསྟུད་མར་བོད་མི་མང་སྤྱི་འཐུས་སུ་འདེམས་ཐོན་བྱུང་ཞིང་། བཙན་བྱོལ་བོད་མིའི་སྤྱི་འཐུས་གྲོས་ཚོགས་སུ་ཚོགས་གཞོན་གནང་མཁན་བུད་མེད་ཐོག་མ་ཡང་ཡིན་པ་མ་ཟད། དུས་ཡུན་ལོ་གསུམ་རིང་ཚོགས་གཞོན་གྱི་ཕྱག་ལས་གནང་། རྒྱ་རི་སྒྲོལ་མ་ལགས་རྡོ་རྗེ་གླིང་གཏན་སློབ་ནས་གཞི་རིམ་སློབ་གྲྭ་ཐོན་པ་དང་། རྗེས་སུ་པན་ཇབ་གཙུག་ལག་སློབ་གཉེར་གྱི་ཅན་དི་གར་མཐོ་སློབ་ནས་ཆབ་སྲིད་ཚན་རིག་ཐོག་སློབ་གཉེར་གནང་ཞིང་སློབ་མཐར་ཕྱིན། རྒྱ་རི་སྒྲོལ་མ་ལགས་གཞོན་ནུའི་ས་གནས་རྒྱུན་ལས་གནང་སྐབས་ལས་འགན་འདྲ་མིན་ཐོག་ཕྱག་ལས་གནང་འདུག་པ་དང་། རྗེས་སུ་དབུས་གཞོན་ནུའི་རྒྱུན་ལས་དུ་ཐེངས་གཉིས་འདེམས་ཐོན་བྱུང་འདུག།

བསྟན་པ་ཚེ་རིང་ལགས་ནི་ལྡི་ལི་སྐུ་ཚབ་དོན་གཅོད་ཁང་གི་འགན་འཛིན་ཟུར་པ་ཡིན་པ་དང་། ཕྱི་ལོ་༢༠༠༠ ལོར་ནང་སྲིད་བཀའ་བློན་དུ་བསྐོ་བཞག་གནང་ཞིང་ལས་ཡུན་ཆ་ཚང་ནང་སྲིད་ལྷན་ཁང་གི་ཐུགས་འགན་བཞེས་འདུག དེའི་རྗེས་བཀའ་བློན་ཁྲི་པ་ཟམ་གདོང་རིན་པོ་ཆེ་མཆོག་ནས་ཕྱི་ལོ་ ༢༠༠༦ལོར་ཁོང་སླར་ཡང་བཀའ་བློན་དུ་བསྐོ་བཞག་གནང་། བསྟན་པ་ཚེ་རིང་ལགས་ནས་ཕྱི་ལོ་༢༠༡༡ བར་ཕྱི་དྲིལ་བཀའ་བློན་དང་ལྡི་ལི་སྐུ་ཚབ་དོན་གཅོད་ཁང་གི་འགན་འཛིན་གཅིག་ལྕོགས་གནང་། ཁོང་ཐོག་མར་ཕྱི་ལོ་༡༩༧༣ ལོར་བཙན་བྱོལ་བོད་མིའི་སྒྲིག་འཛུགས་ནང་ཞབས་ཞུ་གནང་འགོ་བཙུགས་འདུག བསྟན་པ་ཚེ་རིང་ལགས་ནི་ཀ་ལིམ་སྤོང་གྱི་Dr.Grahams Home ནས་གཞི་རིམ་སློབ་སྦྱོང་གནང་རྗེས་མ་དི་ར་སི་མཐོ་རིམ་སློབ་གཉེར་ཁང་ནས་ཚན་རིག་ཐོག་ཉེ་བའི་གཙུག་ལག་རབ་འབྱམས་པ་ཐོན་འདུག

རྡོ་རྗེ་བདེ་བ་ཚང་ལགས་ནི་བདེ་བ་ཚང་ས་རང་གལ་ཞེས་རྒྱ་གར་གྱི་རྒྱལ་ས་ལྡི་ལིར་ཁང་བཟོ་རིག་པའི་ཚོང་ལས་ཞིག་གསར་འཛུགས་གནང་མཁན་དང་དེའི་ཚོང་རོགས་ཀྱང་ཡིན། ད་བར་རྡོ་རྗེ་ལགས་ནས་ལས་ཁུངས་དང་། སྒེར་གྱི་བཞུགས་གནས་ཁང་། དགོན་སྡེ་ཁག་སོགས་མང་པོའི་ཁང་པའི་བཟོ་དབྱིབས་འཆར་འགོད་གནང་ཡོད། རྡོ་རྗེ་ལགས་དང་ཁོང་གི་ཚོང་རོགས་གཉིས་ཀྱིས་ཁང་བཟོ་རིག་པའི་ཚོང་ལས་དང་མཉམ་དུ་ཁང་པ་བཟོ་སྐྲུན་གྱི་ཚོང་ལས་ཡང་གཉེར་བཞིན་འདུག རྡོ་རྗེ་ལགས་སྐབས་བཅུ་བཞི་པའི་བོད་མི་མང་སྤྱི་འཐུས་ལྷན་ཚོགས་ཀྱི་སྤྱི་ཟུར་ཡིན་པ་དང་། བོད་པའི་ཚོང་པའི་ལྷན་ཚོགས་ཀྱི་ཚོགས་གཙོ་ཡང་གནང་འདུག། རྡོ་རྗེ་ལགས་ཆུང་དུས་ཀ་ལིམ་སྤོང་Saint Augustine’s School ནས་གཞི་རིམ་སློབ་སྦྱོང་གནང་རྗེས་པན་ཇབ་གཙུག་ལག་སློབ་གཉེར་ཁང་གི་ཅན་དི་གར་མཐོ་སློབ་ཏུ་ཁང་བཟོ་རིག་པ་སློབ་གཉེར་གནང་འདུག

ལིན་ཌ་ལགས་ནི་ལྡི་ལིར་ཡོད་པའི་སྦྱོང་བརྡར་ཚོགས་པ་(Holistic Training Solutions)གསར་འཛུགས་གནང་མཁན་གཙོ་བོ་ཞིག་ཡིན། ཚོགས་པ་འདི་ཉིད་ལིན་ཌ་ལགས་དང་རང་གི་བཟའ་ཟླ་ཨ་ཡན་ས་ཀྲན་གཉིས་ཀྱིས་ཕྱི་ལོ་༡༩༩༤ ལོར་འགོ་འཛུགས་གནང་འདུག། ལིན་ཌ་ལགས་ཀྱིས་ཚོགས་པ་མི་འདྲ་བ་༡༢༠ ལྷག་ནང་དངུལ་ཁང་ལས་དོན་དང་དཔལ་འབྱོར་སོགས་དང་འབྲེལ་བའི་ལས་རིགས་སྣ་མང་ཐོག་ཕྱག་ལས་གནང་འདུག ལིན་ཌ་ལགས་སུ་སྦྱོང་བརྡར་རིག་པ་བའི་ལག་ཁྱེར་ལྡན་ཞིང་། གཞན་ལ་འཛིན་སྐྱོང་དང་སྒྱུ་རྩལ་གོང་སྤེལ་གཏོང་ཐབས་དང་འབྲེལ་བའི་བསླབ་གཞི་མང་དག་ཅིག་སློབ་ཁྲིད་གནང་བཞིན་ཡོད། འདས་པའི་མི་ལོ་༡༨ རིང་ལིན་ཌ་ལགས་ཀྱིས་རྒྱ་གར་དང་འབྲུག བངྒ་ལ་དེཤ།དུ་བཱཡེ། ཀོ་རི་ཡ། ཨ་རི་སོགས་ཀྱི་སྐྱེ་བོ་ཆིག་ཁྲི་བདུན་སྟོང་ལྷག་ཙམ་ལ་སྦྱོང་བརྡར་གནང་འདུག། ད་ལྟའི་ཆར་ལིན་ཌ་ལགས་ཀྱིས་Training in India – Touching Hearts and Winning Minds’ཞེས་པ་དེབ་ཞིག་ལྗགས་རྩོམ་གནང་བཞིན་འདུག། ལིན་ཌ་ལགས་ནས་རང་ནུས་སྟངས་འཛིན་དང་མིའི་ནུས་ཤུགས་(Personnel Management and Human Resources)ཐོག་ཕྱི་ལོ་༡༩༨༨ ནང་ཇམ་ཤེ་ཏི་སྤུར་ནས་གཙུག་ལག་རབ་བྱམས་ཐོན།

བསོད་ནམས་སྟོབས་རྒྱལ་ལགས་ནི་རྒྱ་གར་རྒྱལ་ས་ལྡི་ལི་ནང་གནས་སྡོད་བོད་མི་ཁེ་ལས་པ་ཞིག་དང་། བྱེ་བྲག་ཏུ་འཛིན་སྐྱོང་ཆེད་ལས་པ་ཞིག་ཡིན། སུ་མི་ཀོ་འགྲིམ་འགྲུལ་ཁང་ཞེས་པའི་སྒེར་གཉེར་འགྲིམ་གྲུལ་ངོ་ཚབ་ཁང་གི་བདག་པོ་ཡིན་པ་མ་ཟད། www.tibetanlama.comཞེས་པའི་དྲྭ་ཚིགས་སྟངས་འཛིན་གནང་མཁན་དང་། དེ་བཞིན་བོད་རྒྱལ་ལོ་ཞེས་བོད་སྐད་ཀྱི་ཟླ་རེའི་བརྙན་བརྒྱུད་གལ་ཆེའི་གསར་འགྱུར་འདོན་སྤེལ་གནང་མཁན་གི་འགན་འཛིན་ཡིན། ཁོང་གིས་ཚོང་ལས་ཁང་དེ་འདྲ་གསར་འཛུགས་གནང་དགོས་པའི་དམིགས་ཡུལ་གཙོ་བོ་ནི་བོད་པའི་གཞོན་སྐྱེས་རྣམས་ལ་ལས་ཀའི་གོ་སྐབས་བསྐྲུན་རྒྱུ་དེ་ཡིན། ད་ལྟའི་ཆར་བསོད་ནམས་ལགས་ཀྱིས་བོད་པའི་གཞོན་སྐྱེས་༡༥ ལྷག་ཙམ་ལ་ལས་ཀ་སྤྲོད་འབུལ་བཞིན་འདུག བསོད་ནམས་སྟོབས་རྒྱལ་ལགས་ལྡི་ལིར་ཡོད་པའི་བོད་པའི་ཚོང་པའི་ལྷན་ཀྱི་ཚོགས་གཙོ་ཡང་གནང་མྱོང་འདུག།

དབུ་དཀར་ཚང་གཡུ་སྒྲོན་ལགས་ལྡི་ལིར་རྟེན་གཞི་བྱས་པའི་ཇ་ཝཱཧར་ལལ་ནེཧ་རུ་གཙུག་ལག་སློབ་གཉེར་ཁང་ནས་རྒྱལ་སྤྱིའི་ཆབ་སྲིད་རིག་པའི་ཐོག་གཙུག་ལག་རབ་འབྱམས་པ་དང་། ཨ་རིའི་ཀྲཕ་གཙུག་ལག་སློབ་གཉེར་ཁང་ནས་རྒྱལ་སྤྱིའི་ཁྲིམས་དང་རྒྱལ་འབྲེལ་ཐབས་བྱུས་ཐོག་གཙུག་ལག་རབ་འབྱམས་པ་ཐོན། ཁོང་ཉིད་ན་གཞོན་ནུས་སྤེལ་ལས་གཞི་ཚོགས་པའི་འགན་འཛིན་མ་གནང་གོང་ནེ་ཐར་ལན་ཌི་དུ་རྟེན་གཞི་བྱས་པའི་གཞུང་འབྲེལ་མིན་པའི་སྒྲིག་འཛུགས་ཀེརེ་དཱ་ཞེས་པའི་རྒྱལ་སྤྱི་ཚོགས་པ་ཞིག་ཏུ་ལོ་གསུམ་རིང་རང་དབང་ཅན་གྱི་སློབ་སྟོན་པའི་ངོ་བོར་ཕྱག་ལས་གནང་། ཕྱི་ལོ་༡༩༩༤ ནས་བོད་ཀྱི་བུད་མེད་ལྷན་ཚོགས་སུ་འབྲེལ་ཡོད་ཉམས་ཞིབ་པའི་ཕྱག་ལས་གནང་ཞིང་རྗེས་སོར་ཚོགས་པའི་རྒྱུན་ལས་སུ་འདེམས་ཐོན་བྱུང་། དེ་ནས་༢༠༠༠-༢༠༠༣ བར་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་དུ་ལས་འཆར་འབྲེལ་ཡོད་ལས་བྱེད་གནང་། ད་ལྟའི་ཆར་དབུ་དཀར་ཚང་གཡུ་སྒྲོན་ལགས་བོད་མི་མང་མདོ་སྟོད་སྤྱི་འཐུས་གནང་མུས་སུ་མཆིས།

ཕི་ལི་པ་ཀེ་རིཀ་ལགས་ནི་ཨིན་ཡུལ་དུ་རྟེན་གཞི་བྱས་པའི་བོད་ཀྱི་ངལ་སེལ་ཚོགས་པ་(Tibet Relief Fund, UK)གི་སྤྱི་ཁྱབ་འགོ་འཛིན་དང་ན་གཞོན་ནུས་སྤེལ་ལས་གཞིར་ཚོགས་པའི་དཔལ་འབྱོར་གྱི་མཐུན་འགྱུར་གནང་མཁན་གཙོ་བོ་ཡིན། ཚོགས་པ་འདིས་ཕྱི་ལོ་༡༩༥༩ ལོར་ནས་བཟུང་བོད་མི་རྣམས་ལ་རོགས་རམ་གནང་བཞིན་ཡོད་པ་དང་། ཚོགས་པའི་ལས་གཞི་རྣམས་ཀྱང་ལོ་རེ་ནས་ལོ་རེ་གཞི་རྒྱ་ཆེ་རུ་འཕེལ་གྱི་ཡོད་པ་མ་ཟད། ཚོགས་པ་འདིས་གཞན་ཡང་ཤེས་ཡོན་དང་མདུན་ལམ་སློབ་སྟོན་སོགས་ཚོགས་པ་གཞན་དག་མང་པའི་ལས་གཞི་སྣ་མང་ཐོག་མཐུན་འགྱུར་གནང་གི་ཡོད། དེ་བཞིན་བོད་ཕྱི་ནང་གཉིས་ཀྱི་སྤྱི་ཚོགས་ནང་འཕྲོད་བསྟེན་དང་། བོད་པའི་ཕྲུ་གུ་དང་སློབ་ཕྲུག། རྒན་རྒོན། རྒྱ་བལ་གཉིས་ནང་ཡོད་པའི་གྲྭ་པ་དང་བཙུན་མ་བཅས་འབྲེལ་ཡོད་མང་པོར་རོགས་དངུལ་གྱི་མཐུན་རྐྱེན་དང་རྒྱབ་སྐྱོར་གནང་བཞིན་ཡོད། ཕི་ལི་པ་ལགས་ནི་བོད་ཚོགས་(Tibet Society)ཞེས་པའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་སྤྱི་ཁྱབ་འགོ་འཛིན་དང་རྒྱལ་སྤྱིའི་བོད་དོན་འབྲེལ་མཐུད་ལས་ཁང་གི་བཀོད་འདོམས་ཚོགས་ཆུང་གི་ཚོགས་མི་ཡང་ཡིན་འདུག།