ན་གཞོན་ནུས་སྤེལ་ལས་གཞི་ནས་མ་འོངས་དམིགས་ཡུལ་དང་མངོན་འདོད་སྒྲུབ་བྱེད་དུ་སློབ་གཉེར་ཁང་དང་ཚོགས་པ་ཁག་མཉམ་ལས་གནང་བཞིན་ཡོད།

ད་ལྟ་མཉམ་ལས་བྱེད་བཞིན་པ་ཁག།

• རི་ཏིན་ཇ་ལི།

ཕྱི་ལོ་ ༢༠༠༩ ལོར་ནས་ད་བར་ན་གཞོན་ནུས་སྤེལ་ལས་གཞི་ཚོགས་པ་དང་རི་ཏིན་ཇ་ལི་གཉིས་ལས་གཞི་འདྲ་མིན་ཁག་ཐོག་མཉམ་སྦྲེལ་གནང་བ་དང། རི་ཏིན་ཇ་ལི་མཉམ་དུ་སློབ་གྲྭའི་སློབ་ཕྲུག་ཕན་ཚུན་གྲོགས་བསྒྲིག་རྒྱ་དང། རྒྱ་གར་དང་བོད་མི་གཉིས་ཀྱི་རིག་གཞུང་དང་ཡུལ་སྲོལ་གོམ་གཤིས་སོགས་ཀྱི་མཐུན་སྒྲིལ་ཟབ་ཏུ་གཏོང་བཞིན་ཡོད་ལ། གཞན་ཡང་ཁོང་ཚོའི་ལས་གཞི་གོ་སྐབས་གཉིས་པ་ཞེས་པའི་ནང་འཛུལ་ཞུགས་པ་གོ་སྒྲིག་ཞུ་ཡི་ཡོད།

• ཨེ་གྲེབ་མུམ་སྦེ།

ན་གཞོན་ནུས་སྤེལ་ལས་གཞིས་ཨེ་གྲེབ་མུམ་སྦེ་ཚོགས་པ་བརྒྱུད་ཐོག་མར་ཕྱི་ལོ་ ༢༠༡༢ ལོར་བོད་པའི་སློབ་ཕྲུག་ ༣ ཙམ་ལ་དབང་པོ་སྐྱོན་ཅན་ཟབ་སྦྱོང་ཕུལ་ཡོད། བདུན་ཕྲག་ ༡༢ རིང་གི་ཟབ་སྦྱོང་དེ་ལོ་ལྟར་ཟླ་བ་ ༡ ནས་ ༤ བར་བན་རྡ་ར་མུམ་སྦེ་ནང་ཚོགས་བཞིན་ཡོད།

• སྤུ་ནེ་པན་ཇི་གྷ་ནི་རྒྱ་གར་རྒྱལ་ཡོངས་ཚོགས་འདུ།

ན་གཞོན་ནུས་སྤེལ་ལས་གཞི་ཚོགས་པའི་གོ་སྒྲིག་འོག་ལོ་ལྟར་ལོ་ན་ ༡༧ ནས་ ༢༧ བར་གྱི་གཞོན་སྐྱེས་བཅོ་ལྔ་ཙམ་ལ་ཚོགས་འདུ་དེར་ཞུགས་རྒྱུའི་གོ་སྐབས་འབུལ་གྱི་ཡོད། ཚོགས་འདུ་དེ་ཉིད་མ་ཧཱ་ར་ཤྲཱིར་ཀྲ་མངའ་སྡེ་ནང་པན་ཇི་གྷ་དུ་ཚོགས་བཞིན་ཡོད།

སྔོན་ཆད་ཀྱི་མཉམ་ལས་ཁག།

• སྒྲུང་གློག་བརྙན་བཟོ་མཁན་སྤྱིན་མཐུན།

ན་གཞོན་ནུས་སྤེལ་ལས་གཞི་ཚོགས་པ་དང་རྡ་རམ་ས་ལར་རྟེན་གཞི་བྱས་པའི་སྒྲུང་གློག་བརྙན་བཟོ་མཁན་སྤྱི་མཐུན་གཉིས་ཀྱི་མཉམ་རུབ་ཐོག་རྒྱ་གར་ནང་ཡོད་པའི་བོད་རིགས་གང་ཞིག་གློག་བརྙན་བཟོ་སྐྲུན་ལ་དོན་གཉེར་ཡོད་པའི་ན་གཞོན་བཞི་ལ་རྒྱལ་སྤྱིའི་ནང་སྙན་གྲགས་དང་མཉམ་མྱོང་ཆེ་བའི་བོད་པའི་གློག་བརྙན་བཟོ་སྐྲུན་པ་བཞི་དང་ལྷན་དུ་ཟླ་གསུམ་རིང་ཕན་ཚུན་གཅིག་ལ་གཅིག་གིས་གློག་བརྙན་བཟོ་སྐྲུན་སྐོར་གྱི་སློབ་སྟོན་བྱེད་པའི་ལས་འཆར་ཞིག་སྤེལ་རྒྱུ་དང། ད་ལན་གྱི་ཟབ་སྦྱོང་འདི་ནང། སློབ་སྟོན་པ་རྣམ་པས་གློག་བརྙན་བཟོ་སྐྲུན་གྱི་སློབ་འཁྲིད་དང་ལྷན་དུ། གཞོན་སྐྱེས་ཚོའི་གློག་བརྙན་ཐུང་གྲས་རིགས་བཟོ་སྐྲུན་གྱི་ལས་རིམ་ལའང་མཛུབ་སྟོན་དང་རྟོག་ཞིབ་བྱས་ཡོད། ང་ཚོས་ལས་གཞི་འདི་འདྲ་བ་སྤེལ་དགོས་པའི་དམིགས་ཡུལ་གཙོ་བོ་ནི། བཙན་བྱོལ་གྱི་ལོ་རྒྱུས་དང་དཀའ་ངལ། འཚོ་བའི་གནས་སྟངས་སོགས་གློག་བརྙན་གྱི་ལམ་ནས་གསལ་སྟོན་དང། གློག་བརྙན་བཟོ་སྐྲུན་གྱི་རིག་གནས་རྒྱ་བསྐྱེད་གཏང་རྒྱུ་དེ་ཡིན།

• རྡ་ས་རྒྱལ་སྤྱིའི་གློག་བརྙན་དུས་སྟོན། (DIFF)

རྡ་རམ་ས་ལ་རྒྱལ་སྤྱིའི་གློག་བརྙན་དུས་སྟོན་གོ་སྒྲིག་གནང་མཁན་གྱི་ཚོགས་མི་ཚོ་དང་མཉམ་རུབ་ཀྱིས། ང་ཚོ་ན་གཞོན་ནུས་སྤེལ་ལས་གཞི་ནས། སྤྱི་ལོ་ ༢༠༡༩ ལོའི་ཟླ་ ༡༡ ཚེས་ ༨-༡༠ བར་གློག་བརྙན་དུས་སྟོན་འཚོགས་བཞིན་པའི་སྐབས་དང་བསྟུན་ནས། བོད་རིགས་སློབ་མ་དང། གློག་བརྙན་བཟོ་སྐྲུན་ལ་དོ་དབྱིངས་ཡོད་མཁན། ད་དུང་ཆེད་ལས་པ་བཅས་ལ་ཉིན་གསུམ་རིང་གློག་བརྙན་བཟོ་སྐྲུན་དང་འབྲེལ་བའི་ཐོག་ནང་དོན་སྣ་མང་ཡོད་པའི་ཟབ་སྦྱོང་གོ་སྒྲིག་ཞུས་ཡོད་པ་རེད།

• ༸གོང་ས་ཏཱ་ལའི་བླ་མ་མཆོག་གི་ཀུན་ཕན་དགེ་རྩ།

ན་གཞོན་ནུས་སྤེལ་ལས་གཞི་དང་༸གོང་ས་ཏཱ་ལའི་བླ་མ་མཆོག་གི་ཀུན་ཕན་དགེ་རྩ་གཉིས་ཕྱི་ལོ་༢༠༠༨ ལོར་ལྡི་ལིར་མཐོ་སློབ་ཏུ་འགྲོ་མཁན་རྣམས་ལ་མདུན་ལམ་དང་སློབ་སྟོན་ཟབ་སྦྱོང་སྤྲོད་སྐབས་འབྲེལ་བ་ཆགས་པ་དང། གཞན་ཡང་ཚོགས་པ་གཉིས་པོས་མཉམ་རུབ་ཐོག་ཟླ་རེར་བོད་མི་ཕྱི་རྒྱལ་གནས་སྡོད་ཚོར་བལྟ་ཚུལ་ཞེས་པའི་གཏམ་བཤད་ལེ་ཚན་ཞིག་ཚོགས་ཀྱི་ཡོད།

• བོད་མིའི་མདུན་ལམ་སློབ་སྟོན་ཁང།

ན་གཞོན་ནུས་སྤེལ་ལས་གཞི་ཚོགས་པ་ནས་བཙན་བྱོལ་གཞུང་དང་མཉམ་དུ་ལྡི་ལིའི་ནང་བོད་མིའི་མདུན་ལམ་སློབ་སྟོན་ཁང་གི་སྡེ་ཚན་ཞིག་བཙུགས་ཡོད། སྡེ་ཚན་དེ་འཛུགས་དགོས་པའི་རྒྱུ་མཚན་གཙོ་བོ་ནི་བོད་པའི་གཞོན་སྐྱེས་རྣམས་ལ་ལས་ཀའི་གོ་སྐབས་བསྐྲུན་རྒྱུ་དང། ཕྱི་ལོ་ ༢༠༡༣ ཟླ་བ་ ༢ ནས་བཟུང་ན་གཞོན་ནུས་སྤེལ་ལས་གཞིའི་འོག་བོད་མི་ ༣༢ ལྷག་ལ་སྡེ་ཚན་འདྲ་མིན་གྱི་ནང་ལས་ཀ་འཚོལ་ཐུབ་ཡོད། དེའི་ཐོག་ན་གཞོན་ནུས་སྤེལ་ལས་གཞི་ཚོགས་པ་ནས་གཞོན་སྐྱེས་ ༢༡ ལ་རི་ཏིན་ཇེལ་གོ་སྐབས་གཉིས་པ་ཞེས་པའི་ལས་གཞིའི་ནང་ཐོ་འགོད་བྱས་པ་དང། གཞོན་སྐྱེས་ ༥ ལ་ཨར་ཁང་ཞབས་ཞུ་བའི་སྦྱོང་བརྡར་དང་དེ་མཐུན་གྱི་ལས་ཀ་རག་ཐུབ་པའི་རམ་འདེགས་ཞུས་ཡོད།

• ལྡི་ལི་བོད་ཁང།

ན་གཞོན་ནུས་སྤེལ་ལས་གཞི་ཚོགས་པ་དང་ལྡི་ལི་བོད་ཁང་གཉིས་ནས་ཟླ་རེར་གཞོན་སྐྱེས་འགོ་ཁྲིད་དང་དོ་དག་སོ་སོའི་ཡར་རྒྱས་གཏོང་ཐབས་ཐད་གསུང་བཤད་གོ་སྒྲིག་ཞུ་གི་ཡོད།

• སྤྱི་མཐུན་མཉམ་འབྲེལ།

ཕྱི་ལོ་ ༢༠༡༤ ལོའི་ཟླ་བ་ ༡༢ པའི་ཚེས་༣༠-༣༡ བར་ན་གཞོན་ནུས་སྤེལ་ལས་གཞི་ཚོགས་པ་དང་སྤྱི་མཐུན་མཉམ་འབྲེལ་གཉིས་ནས་རྒྱལ་སྤྱིའི་ཚོང་ལས་ཚོགས་འདུ་ཞིག་རྒྱ་གར་ལྷོ་ཕྱོགས་མོན་གྷོ་ས་གནས་ནང་ཚོགས་ཡོད།